തെരുവ് നായ്ക്കള്‍ താറാവിന്‍ കൂട്ടങ്ങളെ കടിച്ച് കൊന്നു

അരൂര്‍:മുട്ടയിടുന്ന അഞ്ഞൂറോളംതാറാവുകളെ തെരുവുനായ്ക്കള്‍ കടിച്ചു കൊന്നു.കഴിഞ്ഞ രാത്രിയിലാണ് തെരുവുനായ്ക്കൂട്ടം കൂടിന്റെ വാതലിന്റെ കയര്‍ കടിച്ചു പൊട്ടിച്ച് ഉള്ളില്‍ കയറി താറാവുകളെ ആക്രമിച്ചത്.അരൂര്‍ പഞ്ചായത്ത് പതിനൊന്നാം വാര്‍ഡില്‍  ടി.സി.സി.യില്‍ നിന്ന് റിട്ടയര്‍ ചെയ്ത ചന്തിരൂര്‍ കളപുരക്കല്‍ കെ.കെ. പുരുഷോത്തമന്റേ താണ് താറാവ്. മുപ്പത് വര്‍ഷമായി താറാവ് വളര്‍ത്തുന്നുണ്ടെങ്കിലും റിട്ടയര്‍ ചെയ്ത ശേഷം ഉപജീവനത്തിനായാണ് താറാവ് വളര്‍ത്തല്‍ തുടര്‍ന്നു വന്നത്.

സമീപത്ത് താമസിക്കുന്ന സുഭാഷിന്റെ വീട്ടില്‍ വളര്‍ത്തുന്ന പത്തോളം നായ്ക്കളാണ് താറാവുകളെ കടിച്ചുകൊന്നതെന്ന് താറാവ് ഉടമ പുരുഷോത്തമന്‍ പറഞ്ഞു.സുഭാഷിന്റെ വീട്ടില്‍ നിന്ന് നായ്ക്കള്‍ കടിച്ചു കൊന്ന താറാവിനെ കണ്ടെടുത്തിട്ടുണ്ട്.ഓട്ടോ ഡ്രൈവറായ ഇയാള്‍ രാത്രി ഓട്ടം കഴിഞ്ഞ് വീട്ടിലേക്ക് വരുമ്പോള്‍ ഹോട്ടല്‍ അവശിഷ്ടങ്ങള്‍ കൊണ്ടുവന്ന് പട്ടികള്‍ക്ക് കൊടുക്കാറുണ്ട്.അങ്ങനെ പട്ടികള്‍ അവിടെ തമ്പടിക്കാന്‍ തുടങ്ങി. ഭക്ഷണം കിട്ടാതെ വന്നപ്പോഴാണ് താറാവുകളെ ആക്രമിക്കന്‍ ഇടയാക്കിയതെന്നും പറയുന്നു.616 താറാവുകളെ മുന്നൂറു രൂപ പ്രകാരം അഞ്ച് മാസം മുന്‍പ് വാങ്ങിയതാണ്. മുട്ടയിടുന്ന താറാവുകളെയാണ് വാങ്ങിയത്.കഴിഞ്ഞ ദിവസം 403 മുട്ടകള്‍ ലഭിച്ചതാണ്.എരമല്ലൂര്‍ തഴുപ്പ് പ്രദേശത്ത് വീടിന് സമീപമുള്ള 43 സെന്റ് ഭൂമിയിലാണ് താറാവ് വളര്‍ത്തല്‍ നടത്തുന്നത്. രണ്ടര ലക്ഷം രൂപയുടെ നഷ്ടം കണക്കാക്കുന്നു.ബന്ധപ്പെട്ട അധികാരികള്‍ക്ക് പരാതി നല്‍കുമെന്ന് പുരുഷോത്തമന്‍ പറഞ്ഞു.